Skip to content

#húnermeistari

#hunermeistari

#húnermeistari

Kaupa eintak

Um höfunda

Instagram

Vinnulag skiptir miklu máli að mati Hildigunnar. Í öllu námi og starfi skiptir máli að leggja hart að sér og slaka ekki á. „Þegar gera á vel þarf að leggja allt sitt í það. Hugann, ímyndunaraflið og sköpunargáfuna til að forma og setja verkið af stað og vinna vel. Sama er hvort verið er að læra fyrir próf eða hvort unnið er að verkefni. Taka verður tíma í verkið og líka að lesa sér til. Það eru margar skýrslur þarna úti sem fáir hafa lesið. En ef þú lest þér til og veist hver bakgrunnurinn er, þá ertu mun betur í stakk búin til að takast á við verkefnið. Ég held að okkur gangi alltaf best með það sem við höfum gaman af. Ef að ég hefði ekki áhuga á orkumálum eða jarðfræði, þá ætti ég ekki heima hér. Þetta er nokkuð sem við eigum eftir að verja svo miklum tíma í, daginn út og inn. Lykillinn að velgengni er mikill áhugi á viðfangsefninu.“ Hildigunnur Halldóra Thorsteinsson Framkvæmdastýra Þróunarsviðs Orkuveitu Reykjavíkur #húnermeistari 🙌🏻

Hildigunnur hafði ýmis tækifæri til að búa og starfa í Bandaríkjunum og gekk vel þar en fjölskyldan ákvað í sameiningu að koma heim. Maðurinn hennar hafði verið heimavinnandi með dóttur þeirra frá tveggja mánaða aldri til að Hildigunnur gæti sinnt starfsframa vestra. „Ég vann fyrst hjá litlu jarðvarmafyrirtæki í Kaliforníu en færði mig fljótlega yfir til bandaríska orkumálaráðuneytisins. Þar er 800 manna deild sem vinnur að endurnýjanlegri orku og betri orkunýtingu. Ég vann á jarðvarmasviðinu þar.” Hildigunnur Halldóra Thorsteinsson Framkvæmdastýra Þróunarsviðs Orkuveitu Reykjavíkur #húnermeistari

Eftir menntaskólann tók Hildigunnur sér hlé frá námi í um tvö og hálft ár. Hún hafði kennt siglingar í Nauthólsvíkinni á sumrin í mörg ár, og fór utan og kenndi breskum unglingum í sumarbúðum við Miðjarðarhafið að sigla. Hún kom heim til Íslands, vann sér inn meiri ferðapeninga og fór þá aftur utan í ævintýrin, þessu næst til fjalla í Frakklandi. Þar vann hún á skíðahóteli tvo hálfa vetur. „Þar vann ég nú bara á hótelinu og svo var ég á snjóbretti í eftirmiðdaginn.“ Þú ert sem sagt svolítil ævintýrakona? „Já,“ segir Hildigunnur og brosir. „Ég hef gaman af að taka áhættu og takast á við nýjar áskoranir. Engu að síður vil ég hafa röð og reglu á hlutunum. Það dró mig að raunvísindum og stærðfræði og síðar verkfræði.” Hildigunnur Halldóra Thorsteinsson Framkvæmdastýra Þróunarsviðs Orkuveitu Reykjavíkur #húnermeistari

„Ég hitti ólíka einstaklinga og kynnist margs konar fólki og kem að fjölbreyttum þáttum þjóðlífsins. Nýsköpunin er einnig bráðskemmtileg og gaman að láta gott af sér leiða. Fyrsta verkefni mitt þegar ég kom úr skóla er eitt dæmi um það. Það var nýsköpunarverkefni um hvernig meðhöndla mætti úrgang á annan veg en að urða hann. Þetta var árið 1992. Þá var ég að skoða jarðgerð. Á þeim tíma var fjarlægt mönnum að flokka lífrænan úrgang frá. Nú er talað um þetta og farið er að flokka.“ Helga Jóhanna hefur einnig unnið að hreinni framleiðslutækni og umhverfisstjórnun fyrirtækja. Hún hefur unnið með stórum fyrirtækjum sem smáum við að koma upp umhverfisstefnu, skilgreina hvaða þáttum þarf að stýra og vakta, t.d með Reykjavíkurborg, Landsvirkjun og orkufyrirtækjum. Helga Jóhanna kom að stofnun Vistbyggðaráðs ásamt fjölmörgum öðrum og er formaður samtakanna. Markmiðið er að auka vitund fyrir vistvænu skipulagi og vistvænum byggingum og skilgreina viðmið fyrir það. Framkvæmdasýsla ríkisins hefur sett byggingar sem hún hefur umsjón með í vistvæna vottun. Hönnuðum er þá uppálagt að draga úr efnisnotkun, velja efni sem menga minna og að byggingar séu heilnæmar. Huga þarf að dagsbirtu, hljóðvist og loftgæðum, lýsingu og sorp- og frárennslismálum svo dæmi séu nefnd. Kolefnisspor er hugtak sem á eftir að verða talsvert í umræðunni að sögn Helgu Jóhönnu. p.s. Bókin var skrifuð árið 2014! #húnermeistari Helga Jóhanna Bjarnadóttir sviðsstjóri umhverfismála hjá EFLU

Helgu Jóhönnu er minnisstætt atvik úr efnafræðinni í Háskóla Íslands við námslok. Í verklegri efnafræði höfðu nemendur búið til efni um veturinn. „Um vorið var gerð ferð í Nauthólsvík með efnin. Á þeim tíma var hvorki farið að flokka sorp né eiturefni eða spilliefni. Þetta var heilmikil seremónía – við fórum með kennaranum og hentum öllum efnunum í sjóinn. Ég man að strákur var að sigla þarna fyrir utan á seglbretti og horfði á þetta. Ég spurði kennarann hvort þetta væri rétta leiðin. „Hvað meinarðu,” sagði hann. „Hvað eigum við að gera við þetta? Ef við hellum þessu í vaskinn þá eyðileggjum við allar fráveitulagnirnar!“ Á leiðinni til baka sagði ég kennaranum að ég væri að hugsa um að læra meira um þetta. Efnaverkfræði með sérstaka áherslu á umhverfisverkfræði.“ Helga Jóhanna brosir við tilhugsunina um viðbrögð kennarans sem fullyrti að það væri nú bara tískubóla og spurði hvort hún vildi ekki frekar fara í doktorsnám í efnafræði. Sami kennari var þó fyrstur manna til að fá hana til að halda fyrirlestur um umhverfisverkfræði við Háskóla Íslands. Um ári síðar var Sorpa stofnuð og efnamóttaka hóf starfsemi. Helga Jóhanna Bjarnadóttir sviðsstjóri umhverfismála hjá EFLU #húnermeistari

,,Mjög mikilvægt er að finna hvað þér finnst skemmtilegt. Þú verður góður í því sem þér finnst skemmtilegt og kraftur verður í þér.’’ 💥Helga Jóhanna Bjarnadóttir sviðsstjóri umhverfismála hjá EFLU #húnermeistari

Við val á námi telur hún mikilvægt að rannsaka vel hvaða starfsmöguleikar koma til greina að því loknu. „Stundum hef ég tekið eftir því að það kemur fólki á óvart hvers konar starfsmöguleikar eru í boði að námi loknu. Sumir verða jafnvel fyrir vonbrigðum, svo það er gott að kanna starfsmöguleikana vel áður en lagt er út í eitthvað nám.“ Guðbjört Gylfadóttir stærðfræðilegur forritari hjá Bloomberg, New York #húnermeistari

„Góð regla er að láta stoltið ekki taka völdin og biðja um ráð ef þú hefur velt einhverju of lengi fyrir þér. Tímasparnaður felst í því og hægt er að halda áfram. Skrifaðu samt niður ráð sem þú færð, ekki er gott að spyrja oft um það sama. Guðbjört Gylfadóttir Stærðfræðilegur forritari hjá Bloomberg, New York #húnermeistari 🗽

#hunermeistari

TÆKIFÆRIN Blog at WordPress.com.

Post to

Cancel